os ye zra haghasi na dy os ashna haghasi na dy

اوس يې زړه هغسې نه دى، اوس اشنا هغسې نه دى

ساقي سپک جامونه ورکه، اوس فدا هغسې نه دى

چا يې مات نازک مزاج کړ، چا يې سترګې کړې ورډکې

اوس په ځان هم شکي شوى، اوس رښتيا هغسې نه دى

اوس يې سترګو کې څوک شته دي، اوس يې زړه کې څوک اباد دي

اوس نه ژاړي او نه خاندي، اوس رسوا هغسې نه دى

نه يې مينه شته جملو کې، نه يې کرکه کليمو کې

اوس خپه هغسې نه دى، اوس پخلا هغسې نه دى

نه خطبې له جومات اورم، نه رندان بولي سندرې

اوس ساقي هغسې نه دى، اوس ملا هغسې نه دى

نه شتمن د يار له مينې، نه غريب دى له روزګاره

اوس پاچا هغسې نه دى، اوس ګدا هغسې نه دى

لېونۍ شې، لېونۍ شې، روغ فدا دې لېونى کړ

اوس نادان هغسې نه دى، اوس دانا هغسې نه دى