څه په ګمنامو لارو زه درنه راغلی یمه
بې زړه درغلی وم بې زړه درنه راغلی یمه
ووایه ځه چې څومره درد به وي تیر شوی په ما
زه چې په شپه د بارانه درنه راغلی یمه
چا پسې مړاوې مړاوې ګورې ؟ هغه زه خو نه یم
چا پسې چغې وهې ته ؟ درنه راغلی یمه
زه که په ویښه یم راغلی نو ژوندی څنګه یم ؟
شاید په خوب کې به ویده درنه راغلی یمه
لمدې لمدې لښتې به ستا د پیغلتوب وچې شي
زه چې په زړه اوبه اوبه درنه راغلی یمه
تا د غنم بوټی نو ولې رالیږه ځمکې ته
په همدې تور له اسمانه درنه راغلی یمه
جلاله لپه کړه چې ځمکې ته و نه غورځیږم
نور لکه اوښکه پر باڼه درنه راغلی یمه
No comments:
Post a Comment