له پنجاب څخه انکار ښه
دغه کار تر هر يو کار ښه
جنګ خلاف د هر غدار ښه
د بهرام پر سر ګوزار ښه
"پېښور تر هر ديار ښه"
خو پر خپله نېغه لار ښه
سم پر لار د کندهار ښه
همسفر د ننګرهار ښه
پښتانه غوندې يې ژبه
پښتانه غوندې ګفتار ښه
د پرديو د کاسې نه
پر خپل مټ باندې اعتبار ښه
چي انسان ساتي سرلوړی
داسې ژوند، داسې روزګار ښه
ځان افغان ګڼل بهتره
په دې نوم دی افتخار ښه
د دې شنه بېرغ تر سېوري
خپله شناخته پر مزار ښه
د خوشال خټک ياري ښه
د خوشال خټک اشعار ښه
No comments:
Post a Comment